search

Writer

Tags

How do you feel about the article?

الشهادة يا أخ

كتب ألبير وجيه

- أنت يابنى

= نعم يا دكتور

- قوم قولى انا كنت بقول ايه من اول المحاضرة ولا انت جاى تنام هنا

ده نفس الكلام اللى بتسمعه فى أى سيكشن الساعة 8 الصبح - ده لو بتحضر يعنى-  واللى أكيد بيخليك تفكر 100 مرة.. الله وانا ايه اللى جابنى المكان النتن ده ! بيعدى شريط حياتك المدرسية الجميلة لما كانت أكبر مشكلة فى حياتك انك معاكش قلم تكتب بيه أو مش هتلحق تتفرج على حلقة الكارتون وبتفضل سرحان، ومش بتفوق إلا على واحد من أصحاب الجامعة وهو بيسألك هتعملوا ايه فى البروجكت اللى كمان كام يوم ده؟

"كلنا كنا بنقول زيك كدة، استنى لما تدخل الجامعة وانت هتتمني ترجع للثانوية تانى".. الجملة دى كان دايمًا واحد صاحبى فى الجامعة يقولهالى ردا منه على الجملة اللى بتتقال من أى حد يا عينى فى ثانوية عامة، وأنا كنت ساعتها طالب دحيح مستنى اليوم اللى اخلص ثانوية عامة وأجيب مجموع عالى وأدخل طب او هندسة  علشان الناس تفضل تقول البشمهندس راح، الدكتور جه وأنا كنت أدبى أساسًا بس دى كلها نتثريات، أهم حاجة أخلص من الثانوية وقرفها وانضم لمجتمع الحرية بقى، مجتمع طارق كابو ونجيبة متولى الخولى.

من كلامى مع اصحابى فى جامعات مختلفة ..منهم اللى دخلها بمزاجه ومنهم اللى رماه التنسيق، تقريبا معظم اللى كانوا متفقين عليه كان إن الجامعة صعبة وان أكل الجامعة حلو- وده الجزء المفضل بالنسبة لى- بالرغم من ان فى منهم اللى متكيف جداً من مجتمع الجامعة علشان لقى فيه حاجات مكانتش موجودة قبل كدة ومنهم اللى بيعانى حتى لو مش باين عليه كدة.

على الرغم من انى شايف ان الشخص اللى انت عليه دلوقتى أو اللى لسه هتتغيرله هو نتيجة شوية خبرات وتفاصيل حصلت ليك من أول ما فتحت عينك لحد وانت بتقرأ الكلام ده، جايز يكون فى تفاصيل واضحة وصريحة وجايز يكون فى حاجات محدش يعرفها غيرك، كل ده اجتمع علشان يكونوا ذلك الشخص، وبما انى مؤمن بالكلام ده جداً فاقدر أعترف بصراحة إن مجتمع الجامعة يشبه "فخفخينا فرغلى".

مجتمع مفتوح لأى حد، هتلاقى فيه كل خلق الله، هتلاقى اللى ترتاحله وهتلاقى ناس مثقفة وبتفكر، وهتلاقى ناس عايزه تاخد على دماغها علشان طريقة تفكيرها عادى برضه، كل أنواع الطلبة وكل الشخصيات جزء منهم بيبقى تايه مع أول فترة فى الجامعة، أسئلة وجودية واستغراب، وبما أن الوقت بيعود الواحد فبتبدأ تتكيف وتتعامل مع الوضع وتتأقلم وتشوف نفسك فى الأصغر منك وتضحك عليه.

الجامعة مكان زى أى مكان شارد ساعات، متفائل ساعات، مكان ممكن تحس إنك موجود فيه بالغلط، أو بيحوى ناس مش شبهك، تفاصيل تافهة بس لازم تركز فيها، كل يوم بيعدى هو طبقة فى ساندوتش حياتك جايز بعد شوية تبص لنفسك وتبقى فخور انك كدة وجايز العكس.

ما بين تفاصيل أيامك وزحمة المواصلات وحضور السكاشن ومشاكل اتحاد الطلبة اللى أنت مش مهتم بيها أصلا وقعدة القهوة والسؤال اللى انت نسيت تحله والتحضير والمشاريع وبين الطلبة الدحيحة وأمن الجامعة، وطعم كريب الجامعة السىء، هتفضل شوية الحاجات دى جزء منك فيما بعد هتنسى منها حاجات وهتفتكر منها حاجات بالعافية وهتفضل حاجات فاكرها وكأنها امبارح.. هتروح وتيجى وتتعلم من كل حاجة وهتقعد ساعات مع نفسك سرحان بتفكر هتعمل ايه بعد كدة وايه الخطوة اللى جاية بس اوعى وانت خارج منها تنسى تاخد معاك.. الشهادة يا أخ.

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments