search

Writer

How do you feel about the article?

ازاى تكون مينيماليست.. ويعنى ايه مينيماليست أصلاً؟

- كتبت سلمى جمال -

ممكن تركز معايا شوية صغيرين وهاوعدك مش هاخد من وقتك كتير خالص؟ يعني هنتكلم في حاجة ممكن تكون طرقت على بالك كام مرة كده، أيه "طرقت" دى؟ ما علينا!

عمرك فكرت فى كمية الحاجات اللى ملهاش لازمة في أوضتك؟ بيتك؟ كمية الورق والكتب اللي بقالهم سنين مركونين ومحدش بيعمل بيهم حاجة وبرضه محدش عايز يرميهم؟ طب بلاش دى، الأكياس البلاستيك اللى ملهاش أول من أخر اللى ماليه مطبخ السيدة الوالدة...أقولك سيبنا من بيتكم خالص!

عمرك فكرت ليه فيه ناس معينة بتلبس نفس اللبس كل يوم ومش بيتعبوا نفسهم في التفكير في طقم مختلف كل يوم، يعني زى Steve Jobs لو كنت مركز معاه هتلاقيه مش بيلبس غير نفس البنطلون ونفس البلوفر الأسود.

بالنسبالك الموضوع مميت مش كده؟ أكيد بتقول لنفسك دلوقتي "يعني عمرى كله ألبس نفس الطقم؟ ده أنا هاموت مكتئب كده"، هو بصراحة ولا إكتئاب ولا حاجة! هى فيها نوع من الحرية وهقولك إزاى دلوقتي!

ببساطة ده مفهوم بسيط عن الحياة اسمه "Minimalism"، ولا مش قصدى اللوحات الفنية الرهيبة!

كل ما في الأمر إن ده مبدأ إنك تعيش وأنت بتملك اللى بتحتاجه وبس من غير متقعد تجيب في حاجات زيادة عقلك بيهيألك إنك هتاحتجها وهتموت من غيرها، مع الأسف إحنا بقينا عايشيين فى مجتمع مادى بيستنزف كل الموارد وبيشجعك تشترى أكتر وأنت مش حاسس، عمرك فكرت حياتك هتبقى عاملة ازاى لو اتخلصت حرفياً من كل حاجة أنت بتمتلكها بس عشان مظهرك أو عشان خايف تخسر الحاجة دى أو تفقد قيمتها وهى أصلا ولا ليها أى لازمة!

الموضوع كله بيبدأ بالتدريج إنك تتخلص من 10 حاجات مش بتحتاجهم في حياتك اليومية بعدين بعدها بأسبوع تزود خمس حاجات تانيين وتفضل كده لحد متوصل لـ30 حاجة مش محتاجهم في حياتك اليومية، أنا عارفة زمانك بتفكر حاجات ايه دى اللي ممكن اتخلص منها! بس هقولك كمان شوية  ايه ممكن تتخلص منه وكمان ممكن تفيد مين بيه!

الموضوع يخض مش كده؟ بس تخيل معايا أوضتك وهي من غير الكراكيب اللي مامتك كل شوية تقولك رتبهم، أو تخيل  نفسك وأنت قاعد عايش باللى بتحتاجه وبس من غير ورق ملوش لازمه ولا لبس وكراكيب كتير مأزمة عليك حياتك، لو فكرت شوية هتلاقى الموضوع فيه حرية وصفاء ذهنى ونوعاً من عدم التعلق بحاجات ولا بتودى ولا بتجيب!

انا مش بقولك خليك عابد صوفى بس فكر شوية أنت محتاج أيه بجد وايه بتجيبه وتركنه عشان تبقى شبه اللى حواليك وخلاص! الفكرة نفسها تكمن في عميلة الشراء، لو ركزت فيها هتلاقى إنك بينتهى بيك المطاف بحاجات كتير ملهاش أى لازمة زى أكياس بلاستيك لا حصر لها و"Brochures" لحاجات ولا عمرها هتفيدك!

كل دي حاجات بتتجمع كده وتعمل زحمة فى بيتك وحياتك من العدم! كفاية كلام بقى وهأقولك ايه اللي ممكن تتخلص منه: أولا ً الأكياس البلاستيك الكتيرة، كراتين الجزم، الورق والجرايد، الأزايز الفاضية بمختلف أنواعها (مياة - برفانات - عصائر)، أى لبس وجزم أنت بطلت تلبسهم، و حاجات كتير أنت أدرى منى بيها ومش محتاجها!

 

لو عايز اللي ياخد الحاجات دى ويعمل بيها حاجات مفيدة ومن غير ما يتعبك ويجي لحد باب البيت، خد عندك بقى جمعية "رسالة" وجمعية اسمها "مشكاه" بياخدوا أى حاجة قديمة وملهاش لازمة ليك وبيدخلوهم في "recycling projects" تستحق فعلا!

في الأخر الموضوع كله بيعتمد عليك وعلي نظرتك للأمور واختيار هتعيش حياتك ازاى و بإيه واحب اختم بمقولتين مشهورين من فيلم "Fight Club":

هتلاقوا هنا أكتر من 30 نصيحة إزاي تكون Minimalist  و ازاي تبدأ بالتدريج ;)

https://www.therusticelk.com/32-tips-on-becoming-a-minimalist/

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments