search

سابع جار.. واقع ولا سفالة؟

كتبت - ميار محب

ده مجرد تجسيد للواقع بكل عيوبه اللى انتوا عاملين مش شايفينها - لا واقع ايه وزفت ايه دى سفالة وقلة أدب! وأصلا الكلام ده مش بيحصل فى الحقيقة - مع رجوع عرض مسلسل "سابع جار" رجعنا تانى للصراع الأزلى بين جيلنا وجيل أهالينا ويمكن بين جيلنا نفسه فإذا كان مسلسل "سابع جار" مبالغ فيه وبيدعو لقيم مش موجودة فى مجتمعنا وبينشرها - بيدس السم في العسل زي ما بيقولوا - أو لو الكلام ده واقعى وحقيقى وبيحصل فعلا.

 في الأول والأخر مش هقدر أعمم أو نتفق كلنا على رأى واحد، لإن نظرتك للمسلسل هتكون مبنية على اللى شوفته فى حياتك والبيئة اللي بتحتك بيها، بس للأسف خلينى أقول لك إن مسلسل سابع جار واقعي جداً، يمكن من أسوء صور الواقع، بس أه ده واقع ولو ان فيه شوية مبالغة.

 مبالغة في ايه؟ يعنى مثلا (هبه) فكرة إن ممثل يشوفها وهى بتعمل معاه لقاء صحفى بكل اللخبطة دى ويحبها ويروح يتقدملها،ايه السهوله دى ما لو كده مكنش حد غلب! أنا كطالبة في إعلام مثلا بيطلع عينى عشان اعمل لقاء مع واحد ابن خالة عم مراته ممثل وبيتنك عليا كمان!

بس الواقعى في المسلسل إن فيه بنات زى (هاله) بتتجوز بس عشان تخلف وبيبقى عندها وسواس إن العمر يعدى وهي لوحدها، كمان فيه رجاله زى (طارق) بيخون مراته وبيهدم بيت مستقر ومش فارق معاه ولاده، أو زى (هند) اللى جوزها ملوش أى لازمة فى الحياة غير أنه عالة عليها وعلى أهلها، أو زى (عبدالرحمن) اللى فى مرحلة ثانوى وحب ثانوى ومراهقة ثانوى وكل همه البنات.

أيوه يا جماعه فى رجالة خاينة وفى ستات نكدية وفى بنات open minded !!!

كونك رافض ده أو متقبله ده ميغيرش الواقع، بس الحلو في المسلسل إنه بيبين إن لكل حاجة وحشة سبب يعنى اللى ييخون كان بس محتاج مراته تقربله، اللى عايشه حياتها بالطول والعرض كان أهلها سايبينها تستقل بحياتها من بدرى على أساس إنهم بيدوها الحرية، اللى اتجوزت بس عشان تخلف ما هو من كتر ما كل الناس بتقولها عقبال ما نشوف ولادك وخوفها من إنها تكون لوحدها.

يمكن لو غيرنا الأسباب هنغير النتائج والواقع المزرى ده يتحول لحاجه أحسن.. مين عارف !

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments