search

Writer

How do you feel about the article?

حكاية بنت الإيه.. الانتظار

– كتبت ندى أباظة –

من أصعب الاشياء اللى ممكن تواجه أى واحدة فى حياتها هو "الانتظار"، وعلشان كدة النهاردة "بنت الآيه" هتحكى عنه وعن شوية حاجات ممكن نكون بننتظرها..

الانتظار هو أسوء حاجة ممكنة فى كل حاجة..

إنك تبقى قاعدة مستنية النتيجة تظهر وانتى عندك كمية قلق وخوف ليحصل عكس المتوقع واللى أنتى شايفه أنه المفروض يحصل وتبقى بالنسبالك كارثة، ساعتها هتفقدى ثقتك فى نفسك وثقتك فى إن ممكن تنجحى، مع أن فى الآخر مهما حصل لازم هتنجحى وتعدى المرحلة بكل أشكالها.

إنك تبقى قاعدة مستنية ولادة بيبى جديد، ومستنية تشوفيه، وكان طالع عينك ٩ شهور فتحسى ان المدة طولت وأنتى قاعدة على نار ونفسك تشوفى اول بيبى ليكى و تفرحى كل الناس اللى بيحبوكى و حوليكى ده بردو أصعب أنتظار ...

إنك تبقى قاعدة مستنية نتيجة مرض معين شاكه فيه ونفسك ميطلعش عندك زى ما انتى متخيلة وكل الأوهام بأن ممكن يجرالك حاجة وفى الآخر بنعرف أن كل ده ممكن يكون بلاء من عند ربنا يمكن عشان إحنا مش قريبين منه فبنتحط فى مواقف صعبة علينا بس أكيد ربنا بيشوف هنقدر نستحمل ده و لا لأ.. هل هنقرب منه عشان يساعدنا و لا لأ !

إنك تستنى مكالمة من شخص معين أو رسالة ما وممكن تكون متأكدة أنها مش هتجى بس مستنية عشان أنتى شايفه ان الرسالة دى ممكن تكون هى سبب سعادتك فى الوقت الحالى.. بس لو اديتى نفسك فرصة للحظة أو إنك حتى تعدى من واحد لعشرة عشان تفكرى هتلاقى إنها على المدى البعيد أو حتى بعد يومين أو تلاتة إنها مكالمة مستفديش منها غير بوجع قلب وحزن وانتظار على مفيش.

إنك تبقى قاعدة ومستنية رد مديرك عليكى فى ترقية أو فى علاوة أو إنك اتقدمتى فى شغلك أو حتى لو قالك كلمة "تمام.. براڤو .. كملى" ده لوحدة انتظار يحسسك إنك مستنية من حد أنه يفهمك إنك بتعملى اللى عليكى وأن ممكن زى ما بيقولو "يجى منك"، مع إنك كدة كدة لازم تفهمى أن الإنسان له طاقة ولازم هتكونى بتأدى فى أيام، وبتقعى فى أيام علشان الحياة "فوق وتحت".. و ده بردو انتظار .

حتى ساعات بتستنى أن فترة معينة تعدى من حياتك بفارغ الصبر وترجع تانى زى الأول وإنك تكونى مستنيية، حاجة جديدة تحصل الفترة اللى بعدها تغيرى كل حاجة فى حياتك، أشخاص جديدة.. دعوة دعتيها زمان وبتحقق قدام عينكى، وممكن تكونى مش متخيلة إنها كان ممكن فى يوم من الأيام تتحقق دلوقتى، فالانتظار بكل حالاته متعب جداً.

نصيحة ليكى.. الحياة فيها كتير حلو بس إحنا اللى بنشوف الجانب السئ بس، الحياة فيها كتير حلو يستاهل نعيش علشانه، زى أصحابنا اللى منهم واحده نسخه منك فى كل حاجه، واللى زى مامتك فى نصيحتها، وفى الأم اللى مفيش زيها أبداً.. بصى للى عندك قبل ما تبصى للى مش عندك و أوعى تستنى حاجة أنتى عارفة إنها مش جاية.

الخلاصة: "الدنيا دى غريبة ومش مفهومة عشان كدة لازم على الأقل تسرقى ولو لحظة من الدنيا، تضحكى فيها من قلبك من غير ما تستنى أو تنتظرى حد يعملهالك".

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments