search

مدارس الراهبات

كتبت فرح فريد

كام مرة سمعنا ان بنات مدارس الراهبات رخمين و معقدين و دمهم تقيل و كام ولي امر بيبقي متردد يقدم لاولاده في مدارس راهبات، بس احنا فخورين بتربية مدارس الراهبات ، تلامذة مدارس الراهبات مش معقدين الفرق بين اي حد و بينهم انهم ملتزمين زيادة محترمين زيادة في مجتمع يكاد يكون ميعرفش يعني ايه التزام عشان ببساطة ولاد مدارس الرهبان و الراهبات اتربوا مرتين مرة من البيت و مرة من المدرسة.

المدرسة ربتنا على النظام مكنش ينفع يبقى في بنت ضوافرها طويلة و او لابسة شراب او توكة لون مخالف مش عشان حاجة غير انها قاعدة او نظام المدرسة ولازم نحترمه. المدرسة علمتنا نقول حضرتك للسواق و الدادا و نقول ميرسي حتى لو الحاجة معجبتناش. المدرسة علمتنا نحافظ علي نظافة المكان اللي قاعدين فيه كانت بتنظم مسابقة كأس النظافة لأكثر فصل هيحافظ على نظافة المدرسة و في اكثر الاحيان مكنش حد بياخد الكاس ده عشان كلنا عملنا نفس الحاجة وحافظنا على نظافة بيتنا ده و لحد دلوقتي مش هتلاقي بنت متخرجة من مدرسة راهبات بترمي حاجة في الشارع على طول هتلاقيهم عاملين شنطهم باسكت . المدرسة عملتنا الاتيكيت نقعد بطريقة معينة و نوطي صوتنا واحنا بنتكلم. علمتنا كمان نحس بالناس وكانت بتنظم أيام نروح دار الايتام و نقعد مع الأطفال هناك و يدونا حاجات حلوة نديها لهم و بيجمعوا مننا فلوس نساعدهم بيها.

اهم حاجة اتعلمناها من مدارس الراهبات ان مفيش فرق بين مسلم ومسيحي كلنا كيان واحد، مكناش بناخد بالنا مين مسلم و مين مسيحي غير ساعة حصة الدين. المسلمين بيحفظوا الترانيم مع المسيحيين والمسيحيين كنا بنحفظهم الفاتحة. المدرسين المسيحيين كانوا بيزعلوا مننا لما نفوت صلاة كانوا بيقولولنا ربنا عايز يشوفكوا متتأخروش عليه .

المسلمين في مدارس الراهبات عارفين اسماء اسبوع الالام و عارفين مواعيد الصيام الكبير و الصغير ،و المسيحيين بيصوموا معانا رمضان و بنروح يوم نفطر كلنا في المدرسة و بنحتفل بأعيادنا سوا و كان لازم ناكل مع بعض حلويات المولد و كحك العيد. حضرنا اكاليل في الكنيسة مع صحابنا و زعلنا جدا و عيطنا يوم وفاة البابا شنودة. و لحد دلوقتي هتلاقينا بننجذب لصحابنا المسيحين و بنقول بأمانة و صدقيني زيهم.

المشكلة اننا لما سبنا المدرسة توهنا خرجنا من النظام ده للعشوائية في كل حاجة مبقناش عارفين نتأقلم في مكان مش شبهنا ،ف كنا بناخد جنب من كل حاجة عشان كدة الناس بتحس اننا معقدين و دمنا تقيل بس ده مش ذنبنا .متترددوش انكم تدخلوا ولادكوا مدارس راهبات و متقلقوش هيتربوا احسن تربية و هيتعلموا المحبة و الاحترام و الالتزام بالمواعيد و القوانين و نظافة القلب قبل نظافة المكان ، عشان الراهبات دول اتنازلوا عن كل ما يسعدهم في الدنيا و أفنوا حياتهم لتربية الأجيال.

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments