search

Ladies only groups

- كتبت فرح فريد -

الليديز أونلى جروبس أقتحمت حياتنا، وخلتها عبارة عن سلسلة من " يابنات حد يعرف makeup artist سعرها حنين وفاضية لخطوبة كمان ساعتين!! واللي متعرفش up "، أو saved posts  لحاجات كتير مش عارفين هى ايه بس شايلنها ربما نحتاجها يوما ما أو مشاكل من نوع بيخونك او خانك أو خانك إزاى وإزاى تعرفى أنه بيخونك وخنت كام مرة هتقولى ولا مرة وللأسف محدش قادر يوقف ماسورة الليديز أونلى جروبس اللى ضربت فى وشنا دى.

مبدئيًا كدة تعريف الليديز أونلى جروبس هى جروبس بتعملها مجموعة من السيدات مشكورين لمساعدة السيدات اللي زيهم في إيه بقا؟ أول نوع يا بيبيعوا وبيشتروا أو بيبدلوا مع بعض كل حاجة بقى اللى يجى علي بالك واللى ميجيش وطبعًا عشان المنفعة تعم على الكل لازم كل البنات اللى فى الجروب تضيف باقى صحابها لحد ما بنات مصر كلها بقت فى كل الجروبس دى.

تاني نوع و ده بتاع المشاكل الزوجية والإرتباطات العاطفية والخيانات الغير شرعية والنوع ده بيبقي متخصص للكلام على الرجالة وقد ايه كلهم مصطفي أبو حجر، النوع التالت وده يعتبر الأكثر إفادة من كل ده وهو جروب حد يعرف هتلاقي كل البنات بلا استثناء عندها unlimited screen shots  لصور فساتين و وصفات طبيعية للشعر والبشرة بالخيار والموز والبن والعسل والبيض تحس أنك بتعمل كيكة فى وشك  وأرقام تليفونات كل الميكب ارتست والـphotographers فى مصر بس برضو هتلاقي بنات يدلوك على أحسن الأماكن اللى ممكن تخرج فيها وبكل الأسعار وأحسن أماكن للمذاكرة وأحسن الهدايا وأكثرها creativity.

بالنسبة للنوع الاول وهو جروبس البيع و الشراء إحنا كبنات عندنا سؤال نفسنا حد يجاوب عليه " ليه السعر انبوكس" هو بيتكسف؟ هيتحسد السعر يعنى لو قولتيه in public ؟ بالعكس يا أنسة ده هيوفر عليكى وقت إنك تقعدى تردى علي كل كومنت وتقولى الرد انبوكس وتروحي في الانبوكس تقولي السعر لكل الناس دى بس هو كيفها كدة.

تانى مشكلة بتواجهنا هى مشكلة "ايه البتاع ده و بيعمل ايه" دى بتبقي حاجة معروضة للبيع ومكتوب اسمها بس اختراع يا كوتش كدة المحظوظين بس اللي عارفين ده ايه و فضولنا بيدفعنا نقرأ الكومنتات عشان نعرف منها ايه البتاع ده وبرضه مبنعرفش بس هو غالبًا حاجة مهمة واحنا محتاجينها.

نيجى بقا للنوع الثاني وهو الأكثر متعه "جروبس المطلقات" - أو اللى على وشك إنها تطلق أو اللي عندها ميول للطلاق بس محتاجة اللي يشجعها - النوع ده يا جماعة خارب نص بيوت مصر، اللي بيحصل إن أى  واحدة عندها مشكلة مع خطيبها أو جوزها تيجي تحكي مشكلتها لباقى أعضاء الجروب الموقرين بتطلب رأيهم ودول ينصحوها بحاجة من اتنين يا تسيبه يا تطلق بس هم معاهم حق برضو معذورين ماهى اللى بتحكى المشكلة بتقول كالاتي : "جوزى يا جماعة صحى من النوم نزل الشغل على طول من غير ما يقولى صباح الخير حتي وعطست ومقاليش يرحمكم الله ومقاليش كل سنة وانتى طيبة في عيد العمال اللى قبل اللى فات ومبقاش مهتم بيا زى الأول أنا شاكة أنه بيخونى وبيروح البيت متأخر وبيكدب عليا بيقول إنه كان فى الشغل وبيطلع نار من بوقه وبياكل عيال صغيرة قولولى اتصرف إزاى أنا تعبت" الراجل الغلبان ممكن يكون نايم عادى فى أمان الله وهو بيتحسبن عليه فى الجروب هو وأمه وعيلته كلها.

لو تعمقنا فى النوع ده هنلاقى كذا جروب كلهم لنفس الغرض زى جروب " بيخونك" و"I KNOW HIM" كل اللى على البنت انها تنزل صورة صاحبها أو خطيبها أو جوزها قدام بنات مصر كلها وتشوفه مرتبط بواحده غيرها ولا لأ عشان تزن على خراب عشها، للدرجادى مبقاش فى ثقة ولا ده فراغ ده ولا شيطان و لا المسلسلات كلت دماغنا وهتستفيدى إيه في الأخر هتنكدى علي نفسك وهو لا بيخونك ولا نيلة، كفاية فراغ واعملوا حاجة مفيدة.

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments