search

Writer

How do you feel about the article?

حكاية بنت الايه

- كتبت ندى أباظة -

كل بنت فى الدنيا بتحلم تكون أكتر واحدة مبسوطة ومتألقة ودايما بتشوف إن ده اللى هيثبتلها قد ايه هى "بطلة" قدام نفسها قبل أى حد ودايمًا الأفكار ديه بتيجى فى لحظات تجلى أو أوقات ليلية اللى بتقعد   فيها تفكر مع نفسها ازاى تحقق كل ده بالإضافة لشويه أفكار عاطفية تراود خيالها زى "هو امتى هيجى الفارس الأبيض على الحصان وياخدها لبر الأمان" - اللى هى بتقول عليه "حب حياتها" - وتنام على أغانى رومانسية من تامر حسنى وتامر عاشور للكوبليه الشهير "ياقلبى لا تحزن  فان طريقك ليس مسدودا والحب قادم قادم"، وهوب تروح فى النوم

وتانى يوم بقى تصحى وكلها نشاط وحيوية وتبص لنفسها فى المراية، وتتفاجئ "ايه ده أنا تخنت!! لأ ده أنا ابتدى أخس بقى" وخد عندك بقى من "دايت و رياضة ورياضة ودايت" مع إنها بالليل كانت بتمر بأسعد أفكار ممكن تخطر ببالها، ومن هنا تبدأ رحلة التفكير فى ازاى هتنزل و تتعامل مع الناس وفى نفس الوقت تثبت لنفسها قد ايه هى قوية من وهى لسه عندها ١٨ أو ٢٠ سنة لحد ما تكبر من سن الشباب لسن الرشد وانت طالع بقى 

حكاية "بنت الآيه" هى شخبطة كيبورد من قلبنا وحبة رسومات على قدنا وملحوظة متروسة بين السطورعن أى حاجة بتتكلم فيها البنت، "حكاية بنت الايه" هى حياة بتعيشها كل بنت من سن المراهقة والفارس الأبيض لسن الشباب وحياة الـ"سترونج اندبندنت ومن"، وازاى تقدر تبنى لنفسها حياة وتعيشها بتفاصيلها من أكتر الحاجات الحلوة فيها لأكتر الحاجات اللى ممكن تأذيها، فى حكاية بنت الآيه هنتكلم عن كل حاجة ممكن نتخيلها ونعيشها، وكل حاجة ممكن نحس قد ايه هى مهمة.

خلينا نتكلم واحدة واحدة عن كل حاجة ممكن البنت تمر بيها من حياة عملية، اجتماعية، عاطفية وكمان مشاكل بتقابلها فى حياتها، وهنفكر مع بعض بصوت عالى ازاى ممكن نحاول نساعدها ونخليها تبقى أسعد واحدة فى الدنيا، وفى عز ما فى حاجات ممكن تكسرها، دايمًا فى حاجات ممكن تفرحها وتديها أمل فى بكرة .

أهم حاجة فى قصتنا إننا هنعرف ازاى ممكن نخليها تحافظ على اللى عندها وتكون دايمًا متألقة عشان كدة لو فكرنا بهدوء ممكن نعرف نوصل لحاجات كتير مكناش هنعرف نوصلها واحنا معميين بالغضب أو قلة الحيلة .. وساعتها بس ممكن نتصرف بحكمة وعقل ونقدر كمان نحقق هدفنا.. ولو عندنا حاجات حلوة فى حياتنا لازم نتعلم ازاى نحافظ عليها.

أومال ربنا مدينا عقل ليه ؟ مش علشان نفكر بيه، وكل ده علشان الحياة لازم تستمر سواء رضينا أو لأ.. استنونى فى المقال اللى جاى هنبتدى نحكى عن كل حاجة وهنفضفض مع بعض فى "حكاية بنت الايه".....

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments