search

!يلا دهب

- كتبت آلاء حجازى -

خلصنا إمتحانات وكُلنا مضغوطين وتعبانين صح؟ فكرنا كتير وإحتارنا بين إننا نروح الأقصر وأسوان ولا دهب! وكفة دهب كسبت طبعاً!

دهب بلد جميلة جداً وبسيطة وناسها حلوين وطيبين أوى ولو روحتها مرة أكيد هتصمم تروحها تانى مهما كان قدامك "options" تانية، هى فى الصيف حلوة بس حر شوية إنما فى الشتا بتبقى حلوة جداً، وعلى فكرة بقى نزول البحر فى الشتاء أحلى من الصيف!

دهب من الأماكن اللى السياحة فيها رخيصة جداً، يعنى لو معاك من 1500 ل2000 جنيه أنت هتقضى هناك 5 أيام ملك زمانك، وفى حاجات أرخص بكتير زى ال"events" اللى مع شركات السياحة وسعرها بيبدأ من أول 500 جنيه ل1000 جنيه بالكتير لل3 ليالى و4 أيام وده "average" حلو جداً، بس المشكلة إنها بتربطك ببرنامج محدد، وده مش أحسن إختيار لو حتكون أول زيارة ليك.

خلصت إمتحانات يوم الأحد وكنت فى دهب يوم الثلاثاء أنا وواحدة صاحبتى - آه بنتين لوحدنا ماتتخضوش - دهب أمان جداً على فكرة، مبدأياً حجز الباص بيبقى من أول 150 جنيه ل270 جنيه على حسب درجة "جو باص"، نزلنا في فندق على البحر في الممشى وفى ال"camps" هناك أرخص من كدة بكتير بس مش على البحر ومالهاش شاطئ.

بالنسبة بقى للبحر وحلاوته اللي تشدك تنزل تلقائى من غير ماتحس بنفسك (أوعوا تسافروا من غير مايوهات وتقولوا أصل إحنا فى شتا!) حقولهالكم تانى "نزول البحر في دهب أحلى في الشتا".

البلوهول ده بقى من أجمل الأماكن اللى ممكن تعمل فيها "snorkeling" و"diving" وهتشوف أحلى المناظر الطبيعية وأحلى الأسماك الملونة (حاجة كده خيال)، ومحمية أبو جالوم كمان فيها "snorkeling" تحفة بس البلوهول أحلى، أما بقى لو عايز تنزل تعوم فى بحر كأنه مياه معدنية.. يبقى تروح اللاجونا، أنا مش هتكلم عنها كتير بس هسيبكوا تجربوها وتدعولى. خلصتوا يومكو الصبح وعايزين تنزلوا بليل طبعاً! يبقى أول يوم تروحوا جبل الطويلات، ده بتروحوا بعربيات "4x4" أو "land cruiser" هتلاقى قعدات بدوية وسط الجبل وقدامك النار وناس بتغنى وأنت تستمتع بمنظر النجوم وهناك مافيش شبكات موبايل - أحلى حاجة علشان تفصل - وفيه منهم اللى من غير كهرباء خالص بس شمع ونار وفيه تانين عاملين "stage" و"dj" ورقص وكدة، عامة الإتنين أحلى من بعض وسعرهم بيبقى من أول 70 جنيه ل 150 جنيه لو حتتعشى.

تاني يوم بقى عليك وعلى الممشى وتدخل شارع المشربية "السوق" وتعمل "shopping" وتتفرج على حاجات صعب تلاقي زيها في القاهرة، ونصيحة منى "فاصلوا" مع البياعين.

بعدكدة اطلعوا على البحر واقعدوا فى كافيه على البحر، عادةً كله هيبقى عايز يروح كافيه "everyday" عشان الصور اللى بتشوفوها للمكان فى كل حتة بس أنا مش هنصحكم بيه لأن هو ميزته الوحيدة ال"decoration"، غير كدة فهو زحمة جداً وبقى غالى "over" وهو أصلاً ال"service" بتاعته وحشة جداً فغالباً هتروحوا وتحسوا إنكو اخدتوا أكبر مقلب في حياتكو.

اختاروا كافيه حلو وقعدته ظريفة بس من غير زحمة ودول موجودين كتير وأهم حاجة ال"staff" يكون "friendly" لأن غالباً ساعتها هيبقى ده الكافيه اللى هتقضى فيه ال 3 أيام اللى جايين.

آخر يوم ليك في دهب هتحس بإكتئاب وده عادى جداً للأسف لأنك فعلاً بتبقى مش عايز تروح وبتدور على أى طريقة تقعد بيها يوم زيادة.

اللى قال "من جاء إلى دهب عقله ذهب" فعلاً كان عارف ومتأكد هو بيقول إيه، دهب بلد حلوة وبسيطة وهتستمتع بكل حاجة فيها بعيد عن دوشة القاهرة وزحمتها والأهم من كل ده إن ناسها مبتسمين وfriendly جداً .

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments