search

عمرك وقعت في حب واحد غتت؟

- كتبت بسنت عبد الشافى -

لطيف ولذيذ وبيحصل كتير إنك تقع فى حب شخصية شريرة وتتعاطف معاها طول الفيلم أو المسلسل لكن عمرك حبيت واحد رخم؟

صبري فواز ممثل يمكن مبانش غير متأخر جداً وده لسوء حظنا خالص، يمكن فاكرة أول مرة علم معايا فيها كانت امتى بالظبط غالبًا قبل السبع وصايا فى فيلم كلمني شكرا والشيخ النص كم صاحب المقولة الشهيرة "أنا يا بنتى؟"  وعلق معايا أكتر وأكتر في السبع وصايا، شدني جدا ساعتها، تعبيرات وشه ، أدائه وهو بيصلي العشا وبيقتل أبوه بعدها، تركيزه فى التفاصيل البسيطة زى إتجاه نظراته، حركة إيده وتحكمه المتقن فى كل عضلة فى وشه علشان يخرج بمشهد متقن كده يوصلك كل المشاعر المتضاربة، فى مسلسل درامى من الطراز الأول يعرفك أن معاك شخصية تقيلة تحترف فعلاً التمثيل.

علشان يبهرنى فى"رمضان كريم" وهو بيجسد دور موظف جشع وعريس غتت، حاجة كده اللهم صل عالنبى تخليك تتقفل من الشخصية ومن الدور ومن المسلسل، بس اللطيف بقى إنه معملش كده، برأكشناته وخفة دمه حوًل" خميس" لشخصية  رخمة بس تحبها، أفيهاته وتعابير وشه لوحدها حتى وهو بيحب وبيبقى ملزق كفيلة تخليك تخرج من الحلقة مبسوط، طريقنه السهلة الممتنعة فى أنه يحسسك أنه بيمثل وهو رافع إيده، وكأنه الشخص ده فعلاً، خلانى أركز معاه طول الـ30حلقة .

لحد" رحيم " يمكن صبرى فواز مخدش حقه أوى عالسوشيال ميديا فى رحيم الفترة اللي فاتت مع إنه فى نظرى نجم المسلسل الأول، ويمكن أدائه في بعض المشاهد حسسنى إنه مغطي على أبطال المسلسل الحقيقيين، المشاهد الندية اللى كان فيها حوار بيجمع صبرى فواز بأحد نجوم المسلسل كان متعة فى حد ذاتها.

في مشاهد كتير وقفت عندها وفضلت أعيدها بس علشان اتفرج بمزاج على أدائه، الحوار، حركات عنيه وتحكمه في انفعالاته، طريقته الشريرة المصحوبة بكراكتر كوميدى يخليك تحس أنه مجرم رخم بس أنت مش عارف ليه بتحبه وبتستنى تشوف رد فعله وبتفكر في مشاهده حتى بعد ما تقفل المسلسل.

نادراً لما بنلاقى ممثل من طراز تقيل أوى، طراز خاص بيه لوحده، شخصية راسمها لنفسه تحسسك بمتعة مع كل مشهد له، صبري فواز قدر يحقق معادلة إنك تتعلق بممثل مش بطل العمل بس أنت تحس أنه محور كل حاجة فى الأحداث، فى ظل إفتقار الكتابة والسيناريو فى مصر لطيف إنك تلاقى ممثل حضوره طاغى على نوع العمل، صبر فواز الشرير الغتت اللى لازم تحبه.

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments