search

Writer

How do you feel about the article?

سعد نبيهة راح فين !

- كتبت رنين أحمد -

طبعا مافيش إختلاف إن العيد من أكتر المناسبات اللى بتجمع الناس وتلم شملهم , أيام كلها فرحة وزيارات وخروجات . وأكيد مناسبة سعيدة زى دى مش هتعدى علينا كمصريين من غير طقوس وعادات, واللي في منها غريب شوية واللي مرهق شويتين بس في الأخر بيكون ليها إحساس فرحة مختلف.

يعني مثلاً مافيش بيت مصرى مبيطلعش عينه في التنضيف، وكأنها حملة نضافة جماعية، ماهو العيد ميبقاش عيد من غير مانشيل السجاد ونمسح تحت السراير ,حتي لو مافيش ضيوف هتجيلنا بس دى أوامر جاية من سلطات عليا "الأمهات" ولازم تتنفذ .

خلصنا بقى من التننضيف، ندخل على ركن المعدة، وعشان احنا شعب أكيل بطبعه ولازم الأكل يدخل فى كل مناسبة بيمر بيها، فكان لازم من لمة الكحك والبسكوت، طبعاً اللى بيشتروا الحاجات دى جاهزة بيخسروا كتير أوى، بيخسروا لمة الجيران والأهل قدام الفرن وتقطيع الحاجات وبعدين تزينيها، وبعد كدا بقى تبتدى رحلة البحث عن لبس جديد للعيلة كلها, واللي كان ليه فرحته الخاصة لدرجة إننا كنا بناخده فى حضننا و إحنا نايمين . كمية إرهاق مش معقولة على حاجات يمكن ملهاش لازمة بس هي دي أساسسيات العيد اللى إتربينا عليها.

وبعد كل التعب دا محدش بينام ليلة الوقفة وكله سهران بيحتفل بطريقته الخاصة , لغاية مانسمع تكبيرات العيد . وطبعا أول ماتخلص الصلاة تبتدى الإحتفالات اللي بجد , نروح نركب المراجيح شوية ونرجع بقي نلبس البيجامة الجديدة و قدامنا طبق الترمس والشكولاتة والحلويات ومسرحية العيال كبرت ومن ثم بقي الجزء الأهم وهو زيارات القرايب والعيديات .

بس للأسف من ساعة ماعرفنا إن الأغنية بتقول "سعدنا بيها" مش "سعد نبيهة" وإحنا كبرنا فجأة و كل الحاجات دى مبقاش ليها نفس طعم فرحة زمان , بقينا بنعمل كل حاجة من غير حماس زي ماتكون مجرد روتين ممل , حتى العيدية مبقاش لينا فيها نصيب بحجة إننا كبرنا , لاء وكمان المفروض إن إحنا اللي هنوزع عيدية بعد كدا !

كل اللى عاوزة أقوله إننا مكبرناش على العيدية ولو كبرنا فالمفروض إن العيدية تكبر معانا، ياريت متحرموناش من أخر حاجة بتحسسنا بفرحة العيد، هاتولنا سعد نبيهة، ورجعولنا العيد من تانى .

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments