search

Writer

How do you feel about the article?

كأس العالم فى السف

- كتبت فرح فريد -

في إتجاه سائد كدة بين شباب السوشيال ميديا الروشين بس زاد شوية الفترة دى ألا وهو السف على أى حاجة سواء كانت حلوة ولا وحشة علشان الناس تضحك ويعملوا likes  كتير بس دون مراعاة مشاعر الطرف الآخر.

عامل بالظبط زى العيل الصغير لما يعمل حاجة غلط والناس تضحك عليه فيفتكر نفسه ظريف ويقعد يكرر نفس الغلط تانى عشان الناس تضحك عليه تانى.

مثلاً صورة الولد الفلسطينى "محمد الدرة" اللي أُستشهد على يد قوات الإحتلال في انتفاضة الأقصى، الصورة دى اللى كانت بتخلينا نعيط آه، فجأة تتحول نكتة!! ووالله ما بتضحك أنت جبت لنفسك التهزيق بس، فارحموا من في الأرض يعنى.

الكوميك بتاع البنت اللي بتعيط وأخوها ظريف جداً وسفينا عليه كتير و بنضحك وحتى البنت نفسها كانت بتضحك عليه بس لما السف يوصل للدين يبقى عيب ومش هزار وبرضه مش بيضحك.

مشاركة مصر في كأس العالم مثلاً، بتسف على مدرب المنتخب ليه حضرتك دربت منتخبات قبل كدة؟ إخترت لعيبة قبل كدة؟ لعبت في كأس العالم قبل كدة؟ متجيش بقى تتريق على كوبر عشان مش عاجبك إختياره للعيبة وبنخسر الوديات، لو إفترضنا إنك حريف كرة وبتفهم فيها أوي ده ميديش ليك الحق إنك تقلل من مجهود لاعب ولا مدرب علشان تعالى كدة أحطك في ملعب فى أرض مش أرضك فى ضغط عليك علشان تكسب ماتش وتشرف بلدك والعب و ورينا هتعمل إيه! بطة بلدى بس إحنا فالحين فى السف بس.

بدل اللعيبة مالها بقى؟ أصلها مش متقيفة كويس، طب حضرتك ترزى؟ مش يمكن هم واقفين بجنب مثلاً، كل واحد أدرى بشغله وياريت تكون أدرى بشغلك أنت كمان وسيب الناس في حالها.

الحجة الثانية أصلهم لابسين كوتشيات علي البدل مش شيك خالص يعني ، في حين إن رونالدو كان لابس كوتشي على البدلة و كانوا فرحانين بيه جداً و قد ايه هو شيك، ده نقص طيب ولا إيه! و بعدين مالها الكوتشيات بالعكس الفكرة مختلفة وحقيقي شكلهم حلو جداً و دول لعيبة كرة مش عارضين أزياء ما يلبسوا كوتشيات عادي و مظنش إن في حد بيتريق عليهم غيرنا إحنا بس اللي بنهزأ نفسنا قدام العالم.

ها فاضل ايه مسفناش عليه ناقص بقى لو أخدنا الكأس ميعجبناش لونه مثلاً !

محدش فينا فكر إن السف ده يوصل للعيبة المنتخب ويأثر فيهم بالسلب، صفحة كأس العالم ترحب بوصول منتخبنا وإحنا داخلين نسف ونشتم، بعد غياب مصر 28 سنة عن كأس العالم بدل ما نشجع منتخبنا بنقولهم أنتوا وحشين و هتفضحونا، نسينا إننا من كام شهر بس كنا بنقول يارب نطلع كأس العالم .. دلوقتي بقينا بنتأمر؟! خلونا بس نعمل اللي علينا ونشجعهم ونبطل سلبية وسف عمال على بطال، اللى يقبل الهزار نهزر فيه والهزار لما بيكون مش فى مكانه بيبقى سخافة.

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments