search

دليلك لكأس العالم

- كتب عبده درويش -

فاضل أقل أسبوع وتبدأ البطولة الحلوة اللى بنستناها كل أربع سنين، 32 منتخب قدام بعض هيحاولوا يفضلوا فى روسيا أطول وقت ممكن، فى ناس كتير مش عارفة نص المنتخبات اللى هتلعب أو ده بيلعب فين مثلاً، بعيد عن الإحصائيات والجو ده هتكلم عن المنتخبات دول بشكل سريع وعلشان تبقى متابع كده مش قاعد أو قاعدة مش فاهم حاجة.

- المجموعة الأولى - 

روسيا: منتخب معملش حاجة تذكر فى الكرة كان أيام الإتحاد السوفيتى شغال شوية وبعد إنهياره وبقت روسيا دولة مستقلة، تقدر تقول روسيا كده ضعيفة فرحانة بس أن البطولة على أرضها.

أوروجواى "منتخب العضاض": مين العضاض ده؟ العضاض ده هو مهاجم أوروجواى لويس سواريز عنده تقريبًا عقدة نفسية بيطلعها على اللاعبية زى ما عمل فى كاس العالم 2014 قدام إيطاليا وللى عض فيها كيلينى مدافع إيطاليا، فخلى بالك بقى يا حجازى أنت وعلى جبر، أوروجواى مرشحة تصعد سواريز وكافانى فى الهجوم - حاجة زى الفل يعنى.

السعودية "الكبسة" :الكبسة أكلة فى السعودية مشهورة، الحقيقة السعودية كل شوية بتلعب كاس عالم بس مش بتعمل حاجة تذكر الصراحة، بس السعودية عمومًا من الناس اللى هترجع من روسيا بدرى.

مصر: مش عارف أقول إيه؟ ربنا يستر وصلاح يلحق

 

 

- المجموعة الثانية -

إسبانيا " منتخب العاق راموس": بطل كاس العالم 2010 دلوقتى أصبح مكروه بالنسبة للمصريين لأن راموس العاق بيلعب فيه، فغالبًا هتلاقى أغلب المصريين عايز إسبانيا تخرج بدرى وده صعب لإننا بنتكلم فى راموس وإيسكو ودى خيا وكارفخال وليلة كبيرة أوى سعادتك.

البرتغال " كريستانو رونالدو يعنى": طبعًا هتلاقى أغلب اللى بيشجع البرتغال عشان رونالدو وتلاقيه مش عارف باقى اللاعيبة، بس بشكل عام البرتغال مش وحشة وممكن تكمل وفى عندك كواريزما فى الهجوم وبيبى العنيف فى الدفاع.

المغرب "الشيخة خديجة المغربية": الشيخة خديجة شافت الفنجان فى كاس أفريقيا اللى فاتت وقالت إن المغرب هتكسب مصر ساعتها وتكمل مشوارها فى البطولة لكن تقريبا البن كان مغشوش ومصر صعدت برده، بس لسه مشافتش فنجان المغرب فى كاس العالم، الصراحة المغرب منتخب مجتهد بس حظه وحش أنه فى المجموعة دى.

إيران "بتوع النووى": محدش يعرف عن إيران غير أنهم ليهم فى النووى و بس، بيجوا كاس العالم يسجلوا حضور ويمشوا على طول مش بيعملوا إزعاج.

- المجموعة الثالثة -

فرنسا "النسخة الأفريقية": لو مش متابع كورة وشوفت أغلب لاعيبة فرنسا هتلاقيهم سُمر تحسهم السنغال لابسة تيشرت فرنسا، منتخب فيه جريزمان وبوجبا وديمبيلى ومبابى هيعمل شغل حلو.

الدنمارك "الناس المرتاحة": الدنمارك بتصنف من أعلى الدول فى الدخل وأفضل مناخ للعمل وأسعد مكان فى العالم وأقل الدول فساداً ناس مرتاحة مش زينا، كمنتخب مش وحش وممكن يكمل عندهم ايركسن ده أشهر لاعب عندهم وبيلعب فى توتنهام الإنجليزى.

أستراليا "بلد الكنغر": أستراليا دى محدش فهمها هى بلد مرمية كده لوحدها وفيها حيوان الكنغر بنسبة كبيرة، اعتبروها تابعة لقارة أسيا، وهناك مش هتلاقى منافسة قوية أصلاً فأستراليا من المنتخبات اللى بتصعد على طول وبتمشى بدرى كده كده، أهم واحد عندهم تيم كاهيل القائد والهداف لأستراليا.

بيرو: منتخب مجتهد بعد فترة طويلة بيصعد تانى لكاس العالم زى حالاتنا كده.

- المجموعة الرابعة -

الأرجتنين "ميسى والمنتخب المنحوس": النحس موجود فى جينات الأرجتنين، وصلت فى كاس العالم اللى فات النهائى وخسرت قدام ألمانيا، بعد ما خسرت سنة 90 نفس النهائى قدام ألمانيا برده، فى كوبا أمريكا الأرجنتين وصلت النهائى مرتين قدام تشيلى وصلت لضربات الجزاء وخسرت، فمش كوبر لوحده اللى طلع منحوس، الأرجنتين عمومًا شكلها مش هتكمل كتير يكفى أقولك أن لولا هاتريك ميسى فى ماتش التصفيات مكانوش صعدوا أصلاً، ميسى معاه ديبالا وأجويرو واللاعب المشهور أنه يضيع أهم الفرص مع الأرجنتين هيجواين.

نيجيريا "أشيك تيشرت فى كاس العالم": نيجيريا هتلعب بتيشرت حلو الصراحة فى روسيا حاجة كده فى اللذيذ، منتخب كويس وكل شوية يقع مع الأرجنتين بيلعبوا بعض أكتر من الأهلى والزمالك تقريبًا.

كرواتيا "أى اسم حط فى أخره..يتش": مودريتش، راكتيتش، كوفاسيتسش، ماندزوكيتش، كالينيتش، الله يكون فى عون اللى هيعلق على ماتش ليهم الصراحة، بس منتخب حلو يجى منه.

أيسلندا "جايين نتفسح":  99% من المصريين ميعرفوش أن فى بلد اسمها أيسلندا أساسًا.

المجموعة الخامسة

البرازيل "نيمار وصحبته": بص أنا مش هتكلم كتير هقولك بس عندك نيمار، خيسوس، فيرمينو، كاسميرو، كوتينيو، مارسيليو.. نيمار وصحبته جايين يمسحوا عار السبعة اللى خدوها من ألمانيا فى كاس العالم وشكلهم هيعملوا حاجة.

سويسرا " بتوع الساعات": من المنتخبات الكويسة واللى ممكن تكمل، وأهم اللاعبين شاكيرى.

كوستاريكا "ممكن تعمل حاجة": هو فى أمل من كوستاريكا فى كاس العالم، عملت شغل مش وحش فى 2014 فممكن تكمل وأشهر حد فيها نافاس حارس ريال مدريد.

صريبا: من الدول اللى فيها مشاكل شوية، فى الأول كانت ضمن دولة يوغوسلافيا بعد كده اتفككت بقت صريبا ومونتينيغرو ودلوقتى بقت صريبا بس، فصريبا زى ما أنتوا شايفين مش فاضية أوى للكورة.

- المجموعة السادسة -

ألمانيا "الأسطورة": الماكينات، رقم 1، الناس اللى مش بتهزر، ألمانيا جاية وناوية تدوس على الكل، خلصت التصفيات قبل ما تبدأ وراحوا بالصف التانى جابوا كأس القارات وناويين ياخدوا كاس العالم تانى، مولر وريوس وكروس وأوزيل ونوير.. هتبقى مدبحة يا شقيق.

المكسيك "الخلطة المكسيكة الحارة": المكسيك من الناس اللى بتحب تروح كاس العالم كتير، وبتحاول أنها توصل وتكمل، خافييرهيرنانديز ومعاه ماركيز واللى ميعرفش ماركيز ده لاعيب أساسى فى تشكيلة أى حد بيلعب ببرشلونة فى بيس 6.

السويد "منتخب السلطان":  السلطان إبراهيموفيتش مستمر فى ممارسة موهبته المفضلة فى القصف وقال إن أنا السويد وأنا كاس العالم والكل فى الكل، مدرب السويد حس بالإهانة راح مستبعد إبراهيموفيتش ولو خرجوا بدرى إبرا هيستلمهم تحفيل.

كوريا الجنوبية: مش محتاج تفاصيل كتير عنه أكيد.. واحد مصرى هيشجع كوريا ليه!

- المجموعة السابعة -

بلجيكا "المنتخب المتكامل": فى كاس أوروبا الأخيرة ناس كتير قالت إن بلجيكا هتكون الحصان الأسود وهتأخد البطولة، بلجيكا مكملتش وخرجت وفى روسيا ناس كتير برده متوقعة بلجيكا تكمل وتعمل حاجة، فهل سوف تفعلها بلجيكا، بلجيكا منتخب متكامل شوية فى لاعيبة تقريبًا فى كل مركز كورتوا وكومبانى ودى بروين وهازارد ولوكاكو.

بنما: عملت مفاجأة وصعدت مكان أمريكا كاس العالم هل هتكمل المفاجأة؟

إنجلترا "القطط الثلاثة الأسود سابقا": منتخب فاشل فى نفسه كده، كاس عالم واحدة بس سنة 1966 وغير كده بطة بلدى، معرفش أسود على إيه عمومًا عندهم هارى كين وراشفورد ورحيم سترلينج.

تونس "برشا برشا": ليه لا؟ تونس لو ركزت شوية ممكن تصعد لأنه منتخب مش وحش.

- المجموعة الثامنة -

بولندا "منتخب ليفاندوفسكى" بولندا فضلت مُحتلة من ألمانيا فى الحرب العالمية وبعد كده شافت شوية مشاكل بعد الحرب والكورة، غير أن اللاعيبة البولندية الأصل بعضهم راح يلعب فى ألمانيا زى كلوزه، أهم واحد فى المنتخب ليفاندوفسكى ثم ليفاندوفسكى ثم ليفاندوفسكى.

كولومبيا "بابلو اسكوبار":  بلد اسكوبار وشاكيرا،علموا شغل عالى فى كاس العالم اللى فاتت وحظها وقعها ساعتها مع البرازيل، رفاق رودريجيز ناويين يكملوا فى روسيا.

السنغال "أبناء الحاج ضيوف راجعين":  زى ما طلعت حرب راجع، السنغال راجعة اللى متابع كورة كويس مش هينسى السنغال فى كاس العالم 2002 بقيادة الحاج ضيوف عملوا إيه، ياترى ساديو مانى واللى معاه هيعملوا برده حاجة.

اليابان:  يعنى شينجى كاجاوا بتاع دورتموند وبس كده.

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments