search

الوصية

- كتبت سلمى فتحى القرش -

الموضوع كان فى الأول عادى.. مجرد مسلسل في رمضان في إطار كوميدى خفيف، قصتة برضه بسيطة جداً تتلخص فى أب بيسيب ميراث لأبنه بس علشان ياخده لازم ينفذ "الوصية" وهى أنه يدور على بعض الأيتام اللي كانوا في ملجأ "طلائع البراعم" ويحقق لهم طلباتهم مقابل إمضائهم على الوصية.

اللي مش عادى بقي فى المسلسل هو إختيار اتنين زى "أكرم حسني" و"أحمد أمين"؛ الحقيقة هما ثنائي بيضحك من غير ما يتكلموا أصلا، بس علشان ندى كل واحد حقه فى الكلام، نتكلم على واحد واح..

خلينا نبدأ بـ"أكرم حسني" لإن بالفعل شوفناه بيمثل قبل كده بره شخصية "سيد أبوحفيظه" اللي اتعودنا نشوفه فيها، وبصراحة متوقعتش كل ده يطلع من الخلبوص "أكرم حسنى"؛ بيرمى الإيفيهات بطريقه تموت ضحك حتى لو هى أصلاً بايخه مش بتضحك، بمعنى أدق بيجبر المشاهد علي أنه يضحك.

بالرغم من وزن أكرم إلا ان لما تتفرج عليه تحسه خفيف جداً، مشهد عايز رقص بيرقص، مشهد عايز جرى بيجرى، مشهد عايز نط بينط؛ كله شغال عادى جداً، أكرم كمان عرف يجسد شخصيات كتير زى الولد الروش والصعيدى، بس عمرى ما شوفته بيمثل شخصية مسؤولة أو حد يعتمد عليه، وده اللي بنشوفه فى شخصية "إيبو" المستهتره اللى ملهاش غير في الخروج والسفر وكل شوية في القسم وعايز اللي يخرجه.

                                                                              

نيجي بقى لـ"أحمد أمين" وهنا الموضوع مختلف لأن دى أول تجربة تليفزيونية له؛ أول ما عرفنا أحمد أمين كان بيعمل فيديوهات بسيطة كده ومكنش ناس كتير تعرفه؛ شوية شوية بقى يظهر كمقدم للمهرجانات وحقيقى كان دمه خفيف جداً جداً؛ بعدها عمل برنامج "البلاتوه" اللي استمر لثلات مواسم؛ كان نفسنا نشوف "أحمد أمين" فى برامج تانية.. بس المفاجأه كانت وجوده كممثل؛ لأن هو كان عايز يوصل للنقطة دى وقدر فعلاً إنه يمثل ويثبت أنه جدير بالتمثيل وأنه فعلاً كوميديان حلو أوى ويستاهل كمان أننا نشوفه كل سنه ويظهر كتير.                                       

ظهور "أحمد أمين" بشخصية "سمسم" ابن الدادة موفق جداً فيها بنضارته، بتعبيرات وشه وطريقة كلامه؛ والأهم بقى فى رسم شخصية "سمسم" هى إختياره لملابسها، واللى كانت عبارة عن تيشيرتات عليها شخصيات كرتونيه، الحمالات الملونة، الساعات الملونة؛ واللى كلنا هنموت ونعرف بيجيبها منين، ده غير بيجاماته اللي مجننانا وسراج الدبدوب اللي بياخده في حضنه وهو نايم، ميكس غريب أوى بس ملهوش حل.

مننساش ظهور "ريم مصطفى" تقريبًا لأول مرة فى دور كوميدى، مكناش نتوقع أنها هتكون بالخفه دى، واللى بتظهر فى طريقة مشيتها، ضحكتها، طريقة شيلها للشنطة، لما تيجي تحسب حاجه ومتعرفش،  كمان إختيار الأسم المثير للسخرية والضحك "شاهيطاز العلا"، وأظن أنا وكل المشاهدين أن فى أخر المسلسل "شاهيطاز" هتحب "إيبو".

شخصية "عم ضياء" النكدية الغامقة بزيادة اللى ممكن تقطع أى أمل عند أى حد، ودى علمت أوى مع الناس وابتدوا كمان يعملوا صفحات بأسمه ويتكلموا زيه كل ده ليه؟ يمكن عشان شبه الشعب المصرى! اللى شايف دايمًا نص الكوبايه الفاضى، فى الأول كان عم ضياء لوحده، لحد ما ظهر ابنه اللى مسلمش من نكد أبوه وبقى "عم ضياء2" .

وشخصيات كتير تبان صغيرة بس هى عامله جو حلو أوى للمسلسل زى "المحامى" و"داده عارفه" و"محمد علاء بتاع الجودة" و"لبوسة".. إجمالاً كده المسلسل لطيف وخفيف؛ ومن المسلسلات اللى مجرد ما تتفرج على الحلقه وتخلصها، تلاقى الناس كلها بتقول الإيفيهات بتاعتها زى "متيسرة"، "هنليسها ازاى دى؟!"، "كله رااايح"، "الله - بصوت سمسم"؛ "أستاذ أبو".

كمان أغنية التتر حلوه أوى ولايقه على المسلسل وطبعًا كالعادة بيتألق "أكرم حسنى" في كتباته لكلماتها، مننساش طبعا اللمسات اللي بيقدمها ضيوف الشرف فى الحلقات؛ كل ده كان عامل زى المكعبات اللى اتركبت جمب بعض وعملت مبنى شكله حلو أوى ودمة خفيف، بعيد عن الدراما التقيلة اللى بنشوفها فى رمضان ونقعد نعيط أو نعيش قصة حب رومانسية.

غير المجهود اللى فى المسلسل، تفاعل نجومه على السوشيال ميديا وخاصة " تويتر" خلى الناس تحب الموضوع أكتر وتبقى حريصة أنها تكتب رأيها لأنه هيتشاف ويترد عليه كمان، التفاعل ده رفع من نسب المشاهدة جداً جداً، وكمان زود الإعلانات وده اللى لحظناه من يوم 1 رمضان لحد دلوقتى.

"فكل الشكر لكل شخص شارك فى العمل ده وطلعه بالشكل ده وقدر فعلاً أنه يضحكنا حتى لو بكلمة بسيطه"...

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments