search

مارد راجع

- كتبت رنين أحمد -

طبعًا مفيش إختلاف علي العلاقة اللى بتجمع بين جيل التسعينات والكارتون وأغانى "رشا رزق"، والشخصيات اللي كنا بنتقمصها وكبرت معانا واتربينا عليها واتعلمنا منها كتير، وحاجات كتير لسه فاكرينها ومهما كبرنا أو انشغلنا مش هننساها، كتير ممكن يكون شايف إن دى تفاهة جيل كامل،  بس الحاجات دى علقت معانا بذكرياتها الجميلة ومحدش هيقدر يفهمها ولا يحسها غيرنا.

ومن أكتر الحاجات اللي علقت معانا هى أفلام "ديزني" واللي كنا بنستناها من فترة للتانية؛ أفلام دايمًا بتنقلنا لعالم تانى واتعلمنا منها كتير خصوصًا فى علاقات الصداقة اللى كانت دايمًا ليها أثر فينا وعلمتنا يعنى ايه كلمة صديق بجد، ومن اشهر العلاقات دى كانت علاقة "مارد وشوشني" بصاحبه "شلبي سلوفان" فى فيلم "شركة المرعبين المحدودة"، واللى مفيش اتنين صحاب متخانقوش وهما بيختاروا مين فيهم هيتقمص دور مارد، واللي كان بيجسد فيها شخصية الصديق الجدع اللي طول الفيلم بيساعد صاحبه وبيضحى عشانه من غير مقابل ومالوش معاه مصلحة غير أنه بيحبه بجد، حتي لما اتعرضوا للخطر بسبب "بو"، بعد عنه شوية بس معرفش يستغني عنه ورجع قاله جملته المشهورة "أنا كنت زعلان شوية مش أكتر، كنت محتاج شوية وقت مكانش لازم تسيبني، أنا مش ببهدلك، أنا عايز أفهمك مفيش حاجة أهم من صداقتنا".. ورجعوا تانى مع بعض وواجهوا الخطر.

وعشان مارد شخصية كوميدية مليانة "إيفيهات" زي "المخوفاتي بيبان من سنانه "، "عارف من كتر مانا رومانسي أحيانًا بغير من نفسي"،  "أولا اسمها أعور لما تحب تهزقني هزقني صح "، "عنواني مارد وشوشنى شارع 22 وشوشنى اللي كان علي وشك يروح في الباى باى"، "إحنا نستخدم معالق الشوربة ونحفر نفق برا البلد ".

مكانش هيليق عليها أي صوت دبلجة غير صوت "محمد هنيدى"، اللى معروف في عالم ديزني بصوته المميز وإيفيهاته اللى معلقه معانا كلنا، وكانت أحلي مفاجأة من هنيدى لما عمل تصويت علي صفحته على "تويتر" عشان يدبلج جزء من فيلم ديزني، ومعظم الناس اختارت " شركة المرعبين المحدودة" .

ولما وصل التصويت لـ60 الف صوت صرح هنيدى علي تويتر تحت هاشتاج "#مارد_راجع" وقال "د.سمير حبيب اللي عمل تيمون وبومبا.. جاهز عشان نعمل مارد وشوشني من تاني "، وطلب من الناس تشارك الهاشتاج عشان يختار مشهد يدبلجه بس الكل بيطالب أنه يدبلج الفيلم كله مش بس مجرد مشهد، فياترى هنيدى هيعملها ويدبلج الفيلم كله؟ وياترى أصلا هيرجعلنا مارد بجد ولا هيكون تريند نفرح بيه فترة  زى خلف الدهشورى؟

 

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments