search

قال رويال ويدنج قال

- كتبت ندى أيمن -

تعالوا نتخيل لو كان الفرح ده معمول مثلاً فى حديقة الأورمان أو الميريلاند أكيد كان هيبقى أحلى، ليه بقى! عشان فيه شوية أخطاء مش عارفة إزاى ممكن تكون عدِت علي ميجان وهارى فى الفرح! آه والله زى ما بقولكوا كده.

الـRoyal Wedding فيه أخطااااااااء يا جماعة تعالوا نقولهم واحدة واحدة :

- مفيش فِراشة مع إنى توقعت إن الفِراشة هتحزّم إنجلترا كلها وهيبقى فيه كهارب للركب.

- الميك آب آرتيست بتاعة ميجان مش قد كده؛ فين البلاشر؟ فين الروچ الفوشيا أو الأحمر دم الغزال؟ مفيش رموش عِيرة!! فين لينسز الفنانة مى عز الدين!! شكلها مكيچت نفسها فى البيت عشان هارى قالها فلوس الميك آب آرتيست على العروسة.

- إيه الشعر ده!! فين الصبغة الصفرا!! أين رائحة الأمونيا!! رويال ويدينج ايه بس من غير فورمة!! وليه محدش عملها شعرها بلح بمكواة الشعر !!

- الفستان مفيهوش أى حركة! كانوا خلوا هانى البحيرى يعمله أو أضعف الإيمان يشتروه من العبودى أو حتي تأجره الساعتين دول ! فين الكرانيش و الترتر!

                  

- بوكيه الورد مدعدع أوى! زي حزمة الجرجير!! أكيد هيطلع مش باين في صور الإستوديو!

- مفيش أى إبهار في الفرح يعنى الأمير هارى مقعدش حاطط رجل على رجل ولا ميجان بخّرته ولا كان فيه تنورة مثلاً!!

- إزاى مشغلوش أغنية " لأ لأ طب ينفع كده " و" شحنة و شبرقة " وفين الفنان هشام عباس بأسماء الله الحسنى!

- إزاى محمد صلاح مش معزوم إزاى! ما انتو جايبين ديڤيد بيكهام! ولا هو خيار و فاقوس!

- الأمير هارى مش قادر يجيب كيس رويال چيل بدل شعره المنكوش ده !! لو مش هيصرف في يوم زى ده هيصرف امتى !! كنت لزّقته بشوية مياه يا أخى!

- مفيش حاجة إتوزعت فى حِجر المعازيم وهما قاعدين بالقبعات والطراطير الملكية !! فين سندوتشات البانيه وحتة الجاتوه وأزايز البيبسي الصاروخ !!

- فين فقرة أصحاب ميجان اللي بيلقفوا منها البوكية وبعدها يهروا الدنيا رقص قدام أصحاب هارى علشان يوقعولهم بعريس!! وفين الطنطات بتوع "وانتي بنت مين يا حلوة" !!

- في حزام أبيض الأمير هارى لابسه عامل زى أمناء الشرطة معرفش ليه البدلة كلها مش سودا ويعني عشان أمير يلبسوه بدلة ظباط زى اللى العيال بتتصور فيها فى حفلات المدارس كده !! كان شاف الفنان تامر هجرس بيفصّل فين وجابله بدلة ان شاء الله من "أبو نسمة " !

- فين الشبكة !! فين طقم الدهب اللى جابوه من ميدان الجامع !! طب فين دهب امها اللي المفروض تلبسه يوم فرحها عشان محدش ياكل وشها و يقول عليهم مش قد المقام!

- ليه ميجان مكتبتش علي الفيس بوك " ملكة في مملكتى" و"أميرة في بيتي" مع إن دي أولى واحدة تكتبهم والله !!

- لا شوفنا تورتة دورين من لاپوار ولا حتى من العبد!! وميجان مأكلتش هارى في بقه ليه ولا شرَبته الشربات بالعكس! هو الفرح على الضيق ولا إيه!

كانوا عملوه في السطوح في بيت ميجان وطلعوا بعدها على الجونة يومين وخلصنا ! و بعدين فين الويتر اللي بيرخم علي العريس و العروسة و ينزل الشوكة قال يعني بيخلهم يبوسو بعض هه هه ! وميجان ليه مرمتش الجيرب بتعها للبنات ده حتي المزز اللى في الفرح تتبسط كده!

قال رويال ويدينج قال!! إحنااااااا الفرح !!!

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments