search

5 انواع لاعلانات رمضان

- كتبت فرح فريد -

الإعلانات بقت جزء أساسى من التلفزيون الرمضانى، ويمكن بقت أكتر من المسلسلات يعنى ممكن تكون بتتفرج على حلقة نص ساعة بس كل دقيقتين فاصل 20 دقيقة، المهم انها كل رمضان بتنحصر فى  خمس أنواع مفيش غيرهم بيتكرروا طول الشهر على كل القنوات.

النوع الأول: إعلانات شبكات المحمول

من الاعلانات اللي بنستناها من السنة للسنة من أول إعلان موبينيل "عشان لازم نكون مع بعض" و"بحتاجلك و تحتاجلي" لحد ما بقت أورانج "أنا واد خلاصة لاصة ومية مية" وزى اعلانات فودافون "العيلة الكبيرة" و"أول مرة فى رمضان" اللى طول ما انت ماشي تلاقي الناس بتغنيه ومننساش إعلانات اتصالات اللي بتعملها أصالة " امسك في حلمك" و" تخيل بكرة أحلى".

النوع التانى: إعلانات التبرعات (الشحاتة)

منها إعلانات مبهجة كدة زي إعلانات مؤسسة مجدي يعقوب "ارسم قلب" و" لما القلب يدق" واعلانات 500500 ومؤسسة 57357 "خليك دايما وش الخير" و"افرح و عيش"، وفى إعلانات ملهاش أى لازمة زى الاعلانات اللي بيجيبوا فيها أي ممثل مشهور في أى منطقة عشوائية يقول للناس "معلش الله يكون فى عونكوا" واعلانات رسالة "اتبرع بجنيه اتبرع باللي تقدر عليه" واعلان مستشفي الحروق كل اللى عمله انه حول اغنية " ادى جزاة اللي مايسمعش كلمة ماما تقولها" لـ"وقع الزيت علي وشها حرقه ودمرت حياتها" طب انت كده استفدت ايه غير انك دمرت الاغنية والناس نفرت من اعلانك.

النوع التالت: اعلانات الكومباوند

ده النوع اللي بيجي بعد إعلان التبرعات على طول، طب ما الدنيا حلوة أهيه مش زى العروسة الصغيرة ما بتقول وده غالبًا بيبقي مصدر الجدل والسخرية خلال شهر رمضان، زي إعلان ترايو فيلا بتاع حسين فهمي فيلا بـ3 جناين عشانه هو وأصحابه كانت اقصي مشاكله في الاعلان انه مش عارف يختار أنهى جنينة فيهم!! و سلسلة إعلانات ماونتن فيو باريس بتاعة أحمد عز والكدواني مش أقل من 4 او 5 اعلانات بس احنا كنا بنحب نشوف الاعلان ده عشان احمد عز بغض النظر عن محتوى الإعلان يعني.

النوع الرابع: اعلانات الاجهزة المنزلية

وده غالبًا محدش بيهتم بيه غير لو اللي بتعمله ليلي علوي مثلا، أشهرهم اعلان تكييف كاريير "عايزة تكيف زي بتاع مني" و إعلان بوتجاز يونيفرسال "حبيبي يا رقة" وإعلان ثلاجة فريش "ليط يا حبيبي ليط" اللي بيمثل معاناة الست المصرية المفحوتة تنظيف في البيت ويجي جوزها يبوظ اللي عملته بس ايه علاقة التلاجة بالموضوع ده؟

النوع الخامس: إعلانات بيبسى

كان أحلى إعلان بالنسبة لناس كتير إعلان بيبسي من سنة 2013 لحد دلوقتي يلا نكمل لمتنا، جمعوا كل ذكريات رمضان فى الاعلان ده عمو فؤاد وبوجي وطمطم وفطوطة ونيللي والسنة اللي وراها كملوا الاعلان اللي بيقولنا " متعيشوش فى اللى فات واخلقوا ذكريات تكون لايقة عليكوا"، ده الاعلان اللي بيبهرنا كل سنة وبيخلينا نقول مفيش أحلى من كدة ويجى السنة اللي بعدها يعمل الاحلى عادى جداً.

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments