search

Writer

Tags

How do you feel about the article?

"الشغل اليدوى فى "ديارنا

- كتبت بسنت عبد الشافى -

اختتم معرض الحرف اليدوية "ديارنا" اللي كان للأسف الشديد مدته أربعة أيام بس، واللى افتتحه المهندس شريف إسماعيل رئيس الوزراء المعرض الأربعاء الماضى، ولكن لحسن الحظ تم مده ليوم خامس كمان، المعرض بيضم الحرف اليدوية من أكتر من محافظة في مصر وأكتر من مشروع للبيع وتطوير المنتجات اليدوية.

في الواقع لأنني مغرمة جداً جداً بالشغل اليدوى بكل أنواعه ويمكن كمان مغرمة بالتراث المصرى اللى ليه طابع خاص بيتميز بيه واللطيف في بلدنا أن كل محافظة بتعتبر تقريبا متحف خاص بيها فى التراث، والمعرض كان بيضم كل انواع دي وده اللي بيديك إيحاء انك ماشى وسط متحف كبير بيعرض تراث بلدك بأشكاله.

الشغل السينوى بالياشمك والسرما الدقيقة المتقنة والملاليم اللي بتزوق وبتزين اي حاجة ، كانوا عارضين شنط وبلوزات وعبايات منها الكاجول ومنها اللي تنفع لرمضان واستقبال الضيوف، في الحقيقة السينوية مبدعين في المشغولات اليدوية بتبقى مبهجة جدا بطابعها البدوي

اللي منتشر جدا وابتدا يبقى سمة شهيرة في الجاليريهات المشهورة وبقينا بنلاقيه في ديكورات المسلسلات وصناع خطوط الموضة هو فن "الديكوباج" والرسم على الخشب ، ألوانه كتيرة وعصرية وممكن تكتفي بركن صغير فيه حاجة من المعروضات في البيت علشان يقلب منظر البيت كله ، والمفاجأة إن أسعارهم مكانتش غالية خالص مقارنة باللي بشوفه في الجاليرهات الكتيير اللي بقابلها

 

الجميل والملفت واللي بهرني انني شفت "جمعية النور والأمل" لرعاية الكفيفات ، الميزة في الجمعية انها مش زي اي جمعية خيرية بتطلب مساعدات وخلاص بالعكس هما بيدربوا المكفوفات على المشغولات اليدوية زي البامبو والأكليم والسجاد والتريكو ، واي منتج انت بتشتريه من الجمعية بيروح للبنات دي لتطويرهم وتوفير الخامات ليهم والحقيقة انا كنت معجبة جدا جدا بشغلهم وقد ايه متقن وجميل

في حاجات كتير جدا بهرتني زي المفارش والكروشيهات اللي بقت بتدخل في كل حاجة ،كمان كانت اللوحات والسجاد اليدوي الحرير اللي في نظري ميتقدرش بمال يا جماعة والله

ومن الحاجات الرائعة كان الرسم اليدوي على الأواني والفخار اللي انا شخصيا مقدرتش اقاوم وجبتلي سيفونير منه والحقيقة مبسوطة بيه جدا جداا

الكلام عن المعرض مينفعش يخلص والحقيقة بتمنى من كل قلبي انه يمتد السنة كلها ، المعرض ده نافذة مهمة جدا للصناعة المصرية اليدوية الأصيلة اللي فعلا متقنة وجميلة وللأسف مش مشهورة ومش واخدة حقها وللأسف برضه مبيتصدرش منها الكمية اللي فعلا لازم تتصدر للمنتج ده

حزنت جدا جدا على الدعاية الضئيلة قوي للمعرض وللمنتجات ولأني لحقته في اخر يوم ليه بسبب عدم وجود دعاية ووسائل اعلام كافية للتغطية ، اتمنى انه يلاقي اهتمام اكتر من كداا

المكان جميل والمعروضات متعلقة بشكل حلو ومش متكربس والمساحة لطيفة وده خلاني الف 3 ساعات من غير ما احس بالوقت اطلاقا ، الجميل اللي عملوه السنادي ومكنش موجود قبل كداا انه بقى في كافيتريا علشان لو تعبت من اللف تقدر ترتاح وتشرب حاجة دافية وفعلا كان المكان محتاجها جدا

[caption id="attachment_5560" align="aligncenter" width="225"] الشغل اليدوي بالخشب البامبو[/caption]

اللي اعرفه ان المعرض هيتكرر تاني في شهر سيبتمبر القادم ودي فرصة رائعة وهحاول اغطيه من أوله المرة الجاية ، هو كمان بيتعمل في محافظات تانية زي اسوان والاسكندرية، الأسعار مش غالية خالص ، مقارنة بالتعب والمجهود اللي اتعمل علشان تطلع منتجات يدوية متقنة وراقية ، الأفكار رائعة ومبهجة جدا لأي حد بيحب يغير ديكور بيته أو مفروشاته، اجمالي كانت فسحة جميلة جدا اتمنى تجربوها واتمنى تتعاد

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments