search

Writer

How do you feel about the article?

المستخبى

- كتبت بسنت عبد الشافى -

فى فيلم فتح عينيك – بغض النظر عن الاكشن اللي فيه واللي متاخد من افلام اجنبية اتعملت سنة ٩٠ - إلا أن الراحل خالد صالح كعادته عمل مشهد قوى جدا وهو بينصح البطل نصيحة فى الحقيقة أنا شخصياً وقفت عندها كتير لما قال بصوته: "شكسبير قال في مسرحية من مسرحياته إن الدنيا عباره عن مسرح كبير والناس اللى فيها ماشيين كل واحد بيعمل الدور اللى مكتوب له.. لو كنت ناوى تغير دورك تمد ايدك وتفتح الستاره والله اعلم هتشوف ايه ورا الكواليس بس ممكن اللى تشوفه يخليك ما ترجعش تشوف الدنيا زى ما كانت ولا تقدر تغمض عنيك".

الخوف من المجهول! الرغبة الملحة للانسان انه يعرف كل حاجة بتحصل حواليه، الإحساس بعبارة "انا لا يمكن أكون مغفل وبأى طريقة"، انعدام الثقة في نفسنا وفي اللى حولينا فتخلينا نمد ايدينا على ستارة الكواليس ونشوف حاجات كتير ونراقب ونتحايل ونحاول نعرف هيحصل ايه بكرة فنلجأ لقراية الفنجان والأبراج وفتح المندل، لحد ما نعرف اللى حوالينا مخبيين ايه فنفتش في الموبيلات والـ"whatsapp" والـ"fake accounts" ونخترع الـ"hacking" والتصنت على المكالمات علشان نوصل للى بنسميه في قرارة نفسنا "الحقيقة" اللى بنفتكر بمعرفتها هنرتاح !!

بس يا ترى فعلا هنرتاح؟

فالراحل خالد صالح جاوب باستشهاده لمقولة شكسبير وقال لأ لا يمكن يوصلك كل ده للحقيقة...انت حتى ممكن متعرفش تغمض عينيك او تشوف بعينيك الدنيا زى ما كانت وهتلاقيك بتخسر اللي حواليك واللي في ايديك لمجرد أنك سمحت لنفسك تشوف حاجات مش من حقك تعرفها.

ربنا سبحانه وتعالى خلى حياتنا فيها حاجات كتير مجهولة وأمرنا باحترام الخصوصية، مش علشان الناس اللى احنا بنفتش وراهم، لكن عشان كل واحد في حياته جوانب كتيير قوي مضلمة والجوانب دى ممكن متكونش بتعبر عن حقيقته صح فلما بنشوفها بنتصدم وبنكرهه وتبتدي الصورة تضلم في عنينا مع ان كل ده مكنش المفروض يحصل.. واوقات كتير نرجع نقول يا ريتني ما عرفت، وبردة عشان الشغف والامل والمفاجآت واللى مش متوقعينه وحصل بيكون طعمه أحلي بكتير أوى سواء حلو او وحش، بس في الاخر هى دى الحياة.

اللى عايزة أوصله ان لو من حقنا وفي مصلحتنا حاجة لازم نعرفها، هتيجي لحد عندنا من غير مجهود خصوصًا ان الدنيا "اوضه وصاله" أصلا بس بلاش نسعى ورا حاجات ممكن معرفتها تأذينا، بلاش نخرج عن السيناريو، وبلاش ندخل الكواليس.

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments