search

١٣سبب يخليك تبطل دبش

كتبت بسنت عبد الشافى 

من فترة قليلة كدا اتفرجت على مسلسل انتشر جداً عن واحدة انتحرت بسبب تصرفات زملائها في الثانوى اللى كانت بتتصف بالعدائية أو المعنى الأدق "البلطجة"، المسلسل ده اسمه " 13reason why".

ولأنى تقريبًا فى نفس المرحلة العمرية أو أكبر بكام سنة ومن غير ما أحرق المسلسل للى متفرجش عليه، فهمت جداً هى ليه انتحرت على الرغم من إن ناس كتير لو شافت المسلسل ممكن تعتقد أنه تافه أو أهبل أو إنها أسباب متخليش البنى ادم ينتحر لأن معظم التصرفات شفهيه.. صحيح تتسم بالعدائية والبلطجة بس هو ممكن حبة كلام يموتوا شخص! للأسف فعلاً ممكن شوية كلام يموتوا شخص.

 لما دورت حبة حوالين موضوع الـ"bullying" أو ما يسمى بالتنمر واكتشفت أن فى حوالى أكثر من 15000 شخص حول العالم بيموتوا سنوياً بسببه وده حسب تقرير عملته منظمة الصحة العالمية. 

 - الرقم يخض!! بس هو ايه التنمر أصلا؟ شتيمة يعنى؟؟

هو مش بس شتيمة، ده تصرف فيه نوع من "فرد العضلات" على الشخص اللى قدامنا وللأسف ممكن يطلع في أغلب الاحيان من شخص قريب مننا جداً.

الكاتب تامر عبده امين كان بيحكي عن الموضوع ده في أحد مقالاته وذكر قصة البنت اللي ابتدى يظهر عندها أمراض مناعية وجسمها ابتدى يهاجم نفسه بنفسه بسبب جملة "البدينة ذات النمش" اللي كان خطيبها وحبيبها من الطفولة بيقولهلها، يعنى كمان مش لازم تنتحر، لا ده ممكن نفسيتك تتعب لدرجة تخليك تمرض بأمراض عضوية خطيرة.

السؤال الوجودى بقى: مين فينا مبيتعرضش للتنمر يوميا؟ مين فينا مبيسمعش كلام زى "يا كرتة"، "يا سمرا"، "يا تخينة"، "يامقشة "، "ايه ياض الرفع ده"، ولا  "يا أوزعة"؟ مين فينا بيسلم من التريقة على شكله او لبسه او طريقة كلامه؟

وعلى الجانب الأخر.. كام واحد بيهاجم اللى بيتنمر عليهم وبيقول لا مسمحش بده؟ عدد قليل جداً، أغلبيتنا بيخاف من الإنتقاد أو الإتهام بأنه بيحب ينكد على الناس، مبيتقبلش الهزار أو "ايه ده مالك حساس كدا ليه"...

عبد الرحمن الشرقاوى بيقول "الكلمة نور.. وبعض الكلمات قبور"

يا ريت واحنا بنتعامل مع الناس منكونش سبب أن كلمتنا تكون قبر ليهم يكرههم في نفسهم وفينا.. الكلمة مهمة وبتفضل معلمة في الذاكرة بعد ما تتقال ولمدة محدش ممكن يتخيلها.. الكلمة الطيبة حلوة يا جماعة بلاش نستهزئ بقوة كلامنا علشان محدش فينا عارف اللى حوالينا بيوجهوا ايه في حياتهم فرجاء "كن لطيف".

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments