search

الأتوبيس أبو دورين

- كتبت فرح فريد -

طبعا كلنا عارفين الأتوبيس ابو دورين بتاع اسكندرية، لكن اللى مش كلنا عارفينه ان الاتوبيس ده وصل القاهرة كمان بس مع اختلاف بسيط في كام حاجة كدة.

أول حاجة.. اللون: لون الأتوبيس جمع بين لونين أصفر وأخضر.

ثانى حاجة.. الأتوبيس مش مكشوف لكن مقفول بزجاج عريض عشان الناس اللي بتحب تتفرج على الشارع.

ثالث حاجة بقى.. الاتوبيس ابو دورين بتاع القاهرة مكيف وفيه Wi-Fi وguess what الـWi-Fi  شغال، لا مش بس كده وكمان في مفاجأة ان الأتوبيس فيه فتحات لشحن الموبايل يعني شغل عالي مفيش أحسن من كدة الصراحة.

من اهم مميزات الاتوبيس انه ممكن يحمل 73 شخص ومش مسموح للسواق انه يقف في المحطات بعد ما العدد يكمل، وتذكرته 5 جنيه مش غالية خالص بالنسبة للاتوبيسات المكيفة اللى أسعارها فى الغالب لا تقل عن الـ10 جنيه.

بدأ عمل الأتوبيس أبو دورين في القاهرة من بداية شهر فبراير بس نزل منه عدد قليل من 8 لـ12 أتوبيس كمرحلة أولى، واللى اتكلفت حوالي 40 مليون جنيه، ومن المخطط الدفع بـ28 أتوبيسا آخرين على مراحل ليجوب معظم شوارع القاهرة الكبرى.

طب ليه معظمها؟ ايه الأماكن اللي مش هيبقي موجود فيها؟ مثلا عبد المنعم رياض ورمسيس وشارع كورنيش النيل وكوبرى أكتوبر ده نظرا لارتفاعه عن مستوى الأنفاق والكبارى فميقدرش يمشى فى الأماكن دى.

طب الأتوبيس أبو دورين ده هتلاقيه فين؟ بص يا سيدى لحد دلوقتى له خطين بس، أول خط يبدأ من محطة مترو المرج الجديدة لحد التجمع الثالث، أما ثانى خط يبدأ من الجامعة الامريكية في القاهرة الجديدة مروراً بشارع التسعين ومحور المشير لينتهى بحدائق القبة وبكدة يكون ساهم في حل مشكلة صعوبة المواصلات فى القاهرة الجديدة.

 وفى النهاية عاوزه أسلط الضوء على حاجة حلوة... الأتوبيس أبو دورين ده تم تصنيعه بالكامل فى جمهورية مصر العربية "أم الدنيا".

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments