search

مش كلهم مصطفى أبو حجر

- كتبت ألاء حجازى -

واضح إن فيه إجماع من كل البنات و الستات إن الرجالة كلهم (مصطفى أبو حجر) كلهم خاينين ومش بيعرفوا يحبوا ومش بيهتموا.. إلخ، بس أنا كبنت أحب أقولوكوا إن فيه رجالة بتعرف تحب وبيكتفوا بالبنت اللي معاهم و بيكونوا ضهر و سند فعلاً، بس المشكلة كلها بتكون في إختيارتنا إحنا، إحنا اللي بنختار من الأول بسرعة وغلط ومن غير ما نفكر و لو لـ5 دقايق، آه على فكرة الحب فيه تفكير، لازم نفكر هو الراجل ده اللي هتتحامي فيه من الدنيا كلها؟ هو ده الراجل اللي عايزة تكبرى معاه و يبقالك سند؟ هو ده الراجل اللي هيشجعك على النجاح و يتمناهولك زي ما بيتمناه لنفسه بالظبط من غير ما يغير من نجاحك ده؟ و طبعاً تفكري هو ده الراجل اللي أنتِ تقدري تكوني معاه على الحلوة و الوحشة و تحت أي ظروف هتكوني ليه السند؟

لازم تفكرى إذا كان هو ده الشخص اللى قلبك و عقلك يكونوا مُتفقين عليه، اللى لو قلبك زعل منه مرة عقلك هو اللي يقدر يُحكم بينكم، واللي لو عقلك زعل يبقى قلبك هو اللي هيقدر يِحن و يخليكي تسامحي، بس المهم إن الإتنين يبقوا شغالين 50/50 مافيش حاجة أزيد من حاجة عشان أي علاقة تقدر تنجح و تكمل على أُسس صح و مظبوطة، كل ديه أسئلة و حاجات لازم تفكروا فيها قبل ما تقرروا تختاروا الشخص المناسب اللى يوصل معاكوا للحظة دى.

أنا كنت زى كل البنات فى الأول بقول كلهم مصطفى أبو حجر لحد ماركزت شوية في العلاقة اللي بتربط بابا و ماما ببعض، الحب اللي بيزيد بعد كل مرة يشدوا فيها مع بعض، الحب اللي مش بيتقال فيه كلمة (بحبك) بس هما واثقين من حبهم لبعض، لما يتخانقوا مع بعض بفضل مستنية لحد وقت النوم عشان أشوف مين هينكُش التانى الأول عشان يتكلموا ويتصالحوا عشان يعرفوا يناموا، أو لمعة عين ماما كل مرة بابا يكون راجع فيها من برة و جايبلها الشيكولاتة اللى هى بتحبها، كل ديه أفعال أقوى 100 مرة من كلمة بحبك و كلها مبنية على الإختيار الصح من الأول.

الحب ده حاجة حلوة أوي و يكاد يكون أحلى إحساس الشخص ممكن يحسه في حياته بس مش هتحسوا بيه غير مع الشخص الصح اللي يستحقه.

وعلى رأى أم كلثوم:  "ياللي ظلمتوا الحب و قولتوا وعيدته عليه قولتوا عليه مش عارف إيه، العيب فيكوا يا في حبايبكوا أما الحب يا روحي عليه".

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments