search

اعرف نفسك وعلم عليها

كتبت ميار محب

كلنا عارفين شخص عايش في "الكلوزد بابل" ولو متعرفش حد كده ممكن تكون انت شخصيا الشخص ده..

يعني ايه "كلوزد بابل"؟ يعنى حد عارف اتنين أو تلاته بيعتبرهم كل حاجه فى حياته ويمكن يكونوا أهله اصلا، وفى ناس بيبقوا أوسع شويه ويدخلوا فى "البابل" دى اتنين تلاته صحاب من بره العيله وبعدين بيقفل "البابل" دى وبيرفض يتعرف على ناس جديده ومش بيحاول يدخل ناس جديده فى حياته.

في ناس بيوصلوا لدرجة صعبه جداً وهي انهم يبتدوا يغيروا على الناس اللى في حياتهم ويرفض يخليهم يتعاملوا مع ناس تانية لخوفهم الزيادة من انهم يخسروا الناس دى و"البابل" تفرقع في وشهم!

وفى ناس البابل عندهم واخدة شكل تانى وهي الـ"social media bubble" ودول اللى الحياة بالنسبالهم عبارة عن "facebook-Instagram-Twitter"، وعادة لو عندهم "Snapchat" هيكون بيتفرج على "Stories" الناس ومش بينزل حاجه من أصله (هينزل ايه أصلا! ده حابس نفسه فى الـ"wifi" وباقة الانترنت والحاجه الجديده اللى ممكن تحصل فى حياته ان يجيله ضعف الباقه بنفس السعر مثلا!).

عندك بقى ناس العكس تمامًا ودول الناس الإجتماعيين اللى كل ما يدخلوا مكان يعرفوا كل اللى فيه (عادة هتلاقي كائن سوسه - منطوى - منفسن - حقود - بيكره الناس اللي من النوع ده ويبتدى ينتقدهم ويقول انهم ناس بتحاول تلفت النظر، يلا مش مهم ملناش دعوه يا محى).

المهم بقى الناس الاجتماعيه دى نوعين: نوع ماشي يتعرف علي خلق الله وكل الناس صحابه وكل الناس عارفه تفاصيل حياته واللى هو لو قولتله صباح الخير هيحكيلك تاريخ عيلته وجيرانه وعم عبده البواب.. ونوع تانى بقى عاقل كده وبيعرف يوزن الدنيا تلاقيه اجتماعى والناس صحابه وكل حاجه بس مش أى حد يعرف عنه كل حاجه.. عارف ايه يتقال وبتقال امتي ولمين.

عادة البنى ادم اللى عايش فى "الكلوزد بابل" مش هيقدر يستحمل البنى ادم الاجتماعى ثانيتين على بعض

الزتونة بقى.. لو انت عايش في البابل دى فرقعها وحاول تطلع منها لأن الحياة حلوة، صحيح مش كل الناس حلوه بس مش كلهم وحشين ومش يمكن الاتنين تلاته اللى انت بانى عليهم حياتك يكون في حد أحسن منهم أو يفهمك عنهم وانت لسه معرفتوش! ويمكن برده الاتنين تلاته دول يمشوا والحياة تاخدهم وساعتها هتلاقي نفسك لوحدك وتزعل على كل يوم معرفتش فيه حد جديد.

How do you feel about the article

  • Love
  • Wow
  • Sad
  • Fun
  • Great

Search

Hot Topics

feelings

5 things to do in order to gain control over the Media

Geny Team

تلفيزيون

عندما تكون ركبة رونالدو أهم من وجود نيمار

بسنت عبد الشافي

feelings

5 things to do in order to gain control over the Media

Geny Team

Related posts

Comments